Kaufbeuren
Eisnbohne und Elektrische
Zu dr Eisnbohne gibt s ne vill zun drzähln. Dr Bohnhouf wor fr die waltoffne Stoodt Gablunz und ihre Industrie ne grode a Aushängeschild. Sei Aussahn rejchte einklich ock grode fr ann Vururt- odr ann Güterbohnhouf. Obr wos soll’s? S scheint, a hout n Osprichn geniegt. Dr?er obr de Elektrische. De Gablinzr hießn ihre Stroußnbohne su, ne wie ei Minchn Trambahn odr wie mr sunst su sohte, Bimmlbohne. Jedr woßte, wos mit dr Elektrischn gemejnt wor. Ejne Tour vu dr Elektrischn ging vun Bohnhoufe ei Gablunz, bei dr Post und unsn Routhause vrbei nouch Schlag. De zwejte Strecke wor vun Gehonnsbarge iebr n Grumwald und die steile Routhausgosse ei Gablunz dann ei Seidschwanz nei und wattr bis Reichnou. Ane tolle Sache fr die doumouliche Zeit. Ols klejnes Madl vu fömf, sechs Juhrn wor ich a ufgewacktes Kind, wos immer beschäftigt wardn wollte. Fr miech wor de Elektrische wos extra Ufregndes, ou weil ich amoul allejne mied r ho fohrn dörfn. Und dos kom su: Meine Grußmuttr wouhnte ei Bad Schlag bei dr Tochtr und n zwejtn Suhne, die dorfte ich besuchn. Und etze kömmt s: Iech dorfte worklich ganz allejne mit dr Stroußnbohne zuner fohrn! Ich kon mich noch su ungefähr besönn: Meine Muttr hout mich bei dr Post ei Gablunz ei de Elektrische gesatzt, tote de Fohrkorte bezohln und n Schaffnr Beschejd gahn. Se hotte mit dr Grußmuttr ausgemacht, mit wechr Bohne ich kumm wier und meine Grußmuttr hullte mich dann ou röchtsch bei dr Endstatioun ei Bad Schlag ob. Dos hout prima gekloppt und s wor a ereignisreichr Tag fr miech, o dan ich noch heute garne zoröckedenke. Ich wejß ne, ob su wos heute noch mieglich wäre. Wie ich dann aldr wor, also a Schulmadl, wor Krieg. Soldotn ei Uniform, die of Heimaturlaub worn, konntn ei Gablunz ömasunst fohrn. Mir Schulmadl mußtn 20 odr 30 Pfennich bezohln, obr dos golt fr ane lange Strecke und mr hottn vill Spaß drbeine. Meine Muttr wor ane villbeschäftichte Schneidrmejstrn mit ann gutt giehnden Atelier. Se hotte vill Kundschoft außrholb vu Gablunz, zu dar ich mit dr Elektrischn liefrn gefohrn bie. Ane Kundin an Seidschwanze hotte ane Bäckerei. Dos wor an Kriege wos Schienes, denn dou krichte ich jedsmoul a grußes Stöcke Kleckslkuchn. Och jo, de mejstn Schaffnr an Kriege worn Weibr. Dos tote vill junge Madl reizn, nabn dr Schule dan döttn obwechslungsreichn Dinnst zu machn, ou wemmr s amende ne mit dr Minchner Trambohne hout vrgleichn kenn. Obr s wor abn UNSE Elektrische. Mejnt dr ne ou?